RLEG-k Europaren Etorkizunari buruzko Konferentziari EBn legegintza-botereak dituzten eskualdeen parte-hartze handiagoa eskatu dio (Gobernu Bilera 2021-5-4)

Argitalpen-data: 

Irekia

Gutuna maiatzaren 3an bidali zion, 14 eskualderen izenean, eta hilaren 7an aurkeztuko da. 
RLEG-k, legegintza-botereak dituzten Europako eskualde jakin batzuen taldearen baterako ekimenak, datorren ostiralean lehen ekitaldi publikoa egingo du, oraintsu Europako Batzordeko, Europako Parlamentuko, Europako Kontseiluko eta EBko Kontseiluko presidenteei bidalitako gutunaren harira. Gutun horretan, gobernu sinatzaileetako presidenteek legegintza-botereak dituzten eskualdeek integrazio-prozesuan gehiago inplikatzeko eta elkartutako eskualde gisa estatus bakarrari buruzko eztabaida antolatzeko eskatu dute. 

Dokumentua maiatzaren 3an bidali zuten, eta EBn politikak prestatzeko eta aplikatzeko prozesuan gobernu-maila guztien eta legegintza-botereak dituzten eskualdeen ordezkaritza egokia bermatzeko beharra nabarmentzen du. “Ez dago Europar Batasunik eskualderik gabe. Argi dago legegintza-botereak dituzten eskualdeen parte-hartze esanguratsua behar dela Europaren Etorkizunari buruzko Konferentzian, gobernu-maila guztiak gure Batasunaren etorkizunaren eraketan ordezkatuta daudela bermatzeko”, adierazi dute. 

Gainera, Covid-aren ondoko testuinguruan, inoiz baino ageriago geratu da politika eraldatzaileak behar direla, europarren beharrei erantzungo dietenak. Hori kontuan hartuta, gobernu-maila guztien ordezkaritza egokia ziurtatzeko, kanal berriak ezarri behar dira. Horretarako, RLEG-k Europaren Etorkizunari buruzko Konferentzian parte hartzeko eskatu du eta, horretarako, legegintza-botereak dituzten eskualdeen ordezkariak sartzeko organo plenarioan eta Europaren Etorkizunari buruzko Konferentziaren emaitzak aplikatzeko prozesuaren inguruko erabakietan eta gobernamenduan.

Modu berean, sistematikoki EBko erakundeekin elkarrizketa egituratua hastera animatzen du eta horretarako konpromisoa hartzen du. Gutunak funtsezko proposamen batzuk jasotzen ditu, besteak beste: maila anitzeko gobernamendu eraginkorrari buruzko goi-mailako eztabaida bat antolatzea eta estatu bakarrari buruzko lantaldea sortzea, Alain Lamassoure Europako Parlamentuko diputatu ohiak 2003an proposatu zuen “EBren Eskualde Elkartua/Bazkidea” bezalakoa. 

Dokumentu hori baterako presidentetzei bidali zitzaien, legegintza-botereak dituzten Europako hamalau eskualderen izenean: Euskadi, Valentzia, Balearrak, Katalunia, Tirol, Salzburgo, Austria Beherea, Austria Garaia, Karintia, Aland uharteak, Azoreak, Flandria, eta Vorarlberg eta Korsika  behatzaile gisa. 

Ekimen horren bidez, RLEG-k aurrerapauso bat eman du Batasunean maila anitzeko gobernamendu eraginkorra bermatzeko eta subsidiariotasun- eta proportzionaltasun-printzipioen dimentsio deszentralizatua gero eta hobeto aplikatzen jarraitzeko duen konpromisoan. 

Aurkezpen-ekitaldia online egingo da, ostiral honetan, 2021eko maiatzaren 7an. Bertan, eskualde sinatzaileetako presidenteak eta Alain Lamassoure ohorezko gonbidatua izango dira.

Brusela, 2021eko maiatzaren 4a